पालघर : जागतिक पर्यटन दिन उत्साहात साजरा — पर्यटनाला गती देण्यासाठी केंद्र-राज्याचा निर्धार, पर्यटन मित्रांचा गौरव

   📌 — पालघर प्रतिनिधी २७ सप्टेंबर :

           पालघर जिल्ह्यातील समृद्ध नैसर्गिक सौंदर्य, ऐतिहासिक वारसा आणि सांस्कृतिक वैभव पर्यटनाच्या माध्यमातून देश-विदेशात पोहोचवण्यासाठी सर्व स्तरांवर प्रयत्न सुरू आहेत. या पार्श्वभूमीवर जागतिक पर्यटन दिनानिमित्त पालघर येथे आयोजित भव्य कार्यक्रमात पर्यटन विकासाचा संकल्प पुन्हा एकदा अधोरेखित करण्यात आला.

           हा कार्यक्रम पालघर डिस्टिक टुरिझम वेल्फेअर असोसिएशन, पर्यटन संचालनालय (कोकण विभाग) आणि सोनोपंत दांडेकर महाविद्यालय यांच्या संयुक्त विद्यमाने सोनोपंत दांडेकर महाविद्यालयात मोठ्या उत्साहात पार पडला.

        कार्यक्रमाचे उद्घाटन पालघरचे खासदार डॉ. हेमंत सवरा आणि आमदार राजेंद्र गावित यांच्या हस्ते दीपप्रज्वलन करून करण्यात आले. यावेळी पर्यटन संचालनालयाचे अधिकारी ऋषिकेश नारकर, पर्यटन असोसिएशनचे अध्यक्ष जगदीश ठाकुर, माजी महापौर राजीव पाटील, हॉटेल उद्योगातील संजय पाटील, शिक्षण मंडळाचे अध्यक्ष सचिन कोरे, प्राचार्य किरण सावे यांसह मान्यवर उपस्थित होते.

🌊 पर्यटन विकासासाठी केंद्र–राज्य सरकारची सकारात्मक भूमिका

               खासदार डॉ. हेमंत सवरा यांनी जिल्ह्यातील पर्यटनाच्या अफाट संधींवर भाष्य करताना सांगितले की,

          > “पालघर जिल्ह्यात सागरी, नागरी व डोंगरी पर्यटनाची अपार क्षमता आहे. १२० किलोमीटरचा समुद्रकिनारा, पारंपरिक खाद्यसंस्कृती, गड–किल्ले, राजवाडे व धबधबे हे पर्यटकांना आकर्षित करणारे घटक आहेत. चांगल्या सुविधा व रस्ते उपलब्ध करून देण्यासाठी केंद्र व राज्य सरकार ठोस भूमिका घेत आहेत. मी स्वतः संसदेत पालघरच्या पर्यटन विकासासाठी सातत्याने प्रश्न उपस्थित करून मोठा निधी आणण्याचा प्रयत्न करत आहे.”

              आमदार राजेंद्र गावित यांनीही जिल्ह्याच्या नैसर्गिक सौंदर्याचे कौतुक करताना शाश्वत पर्यटन विकासाची गरज अधोरेखित केली.

           > “सागरी किनारे, डोंगर–दऱ्या, गरम पाण्याचे झरे, वारली संस्कृती, कला आणि अध्यात्मिक स्थळांचे संवर्धन करत पर्यटन व्यवसायाचे रूपांतर शाश्वत विकासात करणे ही काळाची गरज आहे,” असे ते म्हणाले.

            असोसिएशनचे अध्यक्ष जगदीश ठाकूर यांनी आपल्या प्रास्तविकात जिल्ह्यातील पर्यटन संधी,समस्या व शासनाकडून विविध पातळ्यांवर आवश्यक सहकार्य संबधी मांडणी केली.

            🏆 ‘पर्यटन मित्र’ आणि उत्कृष्ट रील पुरस्कारांनी मानाचा सन्मान

             जागतिक पर्यटन दिनानिमित्त पर्यटन क्षेत्रात उल्लेखनीय योगदान दिल्याबद्दल अनेकांना सन्मानित करण्यात आले.

पर्यटन मित्र पुरस्कार :

1. प्रकाश पाटील – कमरा व्हॅली

2. संदेश महादेव निजाई – ग्रीन पॅरेडाइज

3. संजय पाटील – सांज रिसॉर्ट

उत्कृष्ट रील पुरस्कार :

1. भक्ती राहुल म्हात्रे – नेचर स्टे

2. अनिकेत सावे – डॅन रिसॉर्ट

3. उमेश चुरी – माऊली कृषी पर्यटन केंद्र

4. अजय मेहेर – मनोरमा रिसॉर्ट

            पर्यटन प्रचारात विशेष योगदानाबद्दल रंजीता पाटील यांचा विशेष सत्कार झाला, तर आदिवासी वाद्य ‘तारपा’ला राष्ट्रीय कीर्ती मिळवून देणारे भिक्या धिंडा यांनाही गौरविण्यात आले.

📰 विशेष पर्यटन अंक आणि नव्या उपक्रमांचे उद्घाटन

          या कार्यक्रमात ‘कोकण रंग’ या वृत्तपत्राच्या पर्यटन विशेषांकाचे संपादक राजेश राऊत यांनी प्रकाशन केले, तसेच खासदारांच्या हस्ते वैभव घोलप यांच्या ‘जव्हार टुरिझम रील’ चे उद्घाटन करण्यात आले.

🙌 संघटनांचा सहभाग आणि यशस्वी आयोजन

            कार्यक्रमाचे सूत्रसंचालन प्रा. विवेक कुडू यांनी केले, तर आभार प्रदर्शन असोसिएशनचे कार्यवाह अजय राऊत यांनी मानले.

            कार्यक्रमाच्या यशस्वी आयोजनात उपाध्यक्ष हरिश्चंद्र चौधरी, कोषाध्यक्ष नितीन म्हात्रे, सहकार्यवाह रमेश पाटील, संचालक मंडळातील विजय घरत, धीरेंद्रसिंग ठाकूर, देवानंद शिंगडे, संजय पाटील, संध्या म्हात्रे, विजय चुरी, रोहित राऊत, राजेश म्हात्रे, संदेश निजाई, आकाश सावे, राहुल म्हात्रे, दीपेश ठाकूर, कवीश पाटील, प्रशांत म्हात्रे, भक्ती म्हात्रे, विनीता राऊत, नेहा म्हात्रे, सायली राऊत, अशिता राऊत, आदित्य पाटील, देवांशु म्हात्रे यांचे विशेष योगदान लाभले. जिल्ह्यातील व्यावसायिक बांधव व पत्रकारांनी कार्यक्रमास उत्स्फूर्त प्रतिसाद देऊन पर्यटन दिनाला विशेष प्रसिद्धी दिली.