नवयुग पालघर

****सहा गुन्हे दाखल, तरीही फसवणुकीचा सिलसिला सुरूच; बोईसरमधील एटीएम भामटा अटकेत****

**बोईसर २, तुळींज १, काशिमिरा २, नारपोली १ अशा सहा गुन्ह्यांची नोंद; ३३ हजारांची फसवणूक उघड**

पालघर : बोईसरमध्ये एटीएम कार्डची हातचलाखीने अदलाबदल करून बँक खात्यातील ३३ हजार रुपये लंपास केल्याप्रकरणी पालघर पोलिसांनी क्रिशन शिवनारायण तिवारी (वय २७) याला अटक केली आहे. मात्र, या आरोपीविरुद्ध यापूर्वीच बोईसर, तुळींज, काशिमिरा आणि नारपोली पोलीस ठाण्यांत सहा गुन्हे दाखल असल्याचे तपासात समोर आले आहे. त्यामुळे यापूर्वीच्या गुन्ह्यांनंतरही फसवणुकीचे प्रकार सुरू राहिल्याने अशा सराईत आरोपींना रोखण्यात यंत्रणेला कितपत यश येते, असा प्रश्न उपस्थित होत आहे.

२८ सप्टेंबर २०२६ रोजी बोईसर पूर्व येथील टाटा हाऊसिंग परिसरात, अधिकारी रुग्णालयाजवळ असलेल्या स्टेट बँक ऑफ इंडियाच्या एटीएम केंद्रात मोहम्मद काशीम अब्दुलकादर बावला हे पैसे काढण्यासाठी गेले होते. यावेळी एका अनोळखी व्यक्तीने ते एटीएममध्ये गोपनीय संकेतांक टाकत असताना तो पाहून घेतला आणि हातचलाखीने त्यांच्या कार्डची अदलाबदल केली. त्यानंतर त्यांच्या बँक खात्यातून ३३ हजार रुपये काढण्यात आले.

याप्रकरणी ३० सप्टेंबर रोजी बोईसर पोलीस ठाण्यात गुन्हा क्रमांक ४३३/२०२६ नोंदवण्यात आला. तांत्रिक विश्लेषण आणि गोपनीय माहितीच्या आधारे पोलिसांनी आरोपीची ओळख पटवून ११ ऑक्टोबर रोजी त्याला अटक केली. त्याच्याकडून फसवणुकीची ३३ हजार रुपयांची रोख रक्कम आणि गुन्ह्यात वापरलेली दुचाकी जप्त करण्यात आली आहे.

चार पोलीस ठाण्यांत सहा गुन्हे

पोलिसांनी दिलेल्या माहितीनुसार, आरोपीविरुद्ध बोईसर पोलीस ठाण्यात दोन, तुळींजमध्ये एक, काशिमिरा येथे दोन आणि नारपोली पोलीस ठाण्यात एक असे एकूण सहा गुन्हे दाखल आहेत. त्यानंतरही बोईसरमध्ये पुन्हा एटीएम कार्डची अदलाबदल करून फसवणूक केल्याचा आरोप त्याच्यावर आहे.

वारंवार गुन्ह्यांची नोंद असलेल्या आरोपींकडून अशा प्रकारांची पुनरावृत्ती कशी होते आणि ती रोखण्यासाठी कोणती प्रतिबंधात्मक पावले उचलली जातात, हा या प्रकरणातील महत्त्वाचा मुद्दा आहे. 

या प्रकरणाचा पुढील तपास बोईसर पोलीस ठाण्याचे पोलीस उपनिरीक्षक ऋषिकेश मुठे करीत आहेत. ही कारवाई पोलीस अधीक्षक यतिश देशमुख, अपर पोलीस अधीक्षक विनायक नरळे आणि बोईसर विभागाचे उपविभागीय पोलीस अधिकारी दिनेश बैसाने यांच्या मार्गदर्शनाखाली करण्यात आली.

एटीएम वापरताना सावधगिरी आवश्यक

एटीएममध्ये गोपनीय संकेतांक टाकताना तो इतरांना दिसणार नाही याची काळजी घ्यावी. अनोळखी व्यक्तीने मदतीच्या बहाण्याने जवळ येऊन कार्ड हाताळण्याचा प्रयत्न केल्यास सतर्क राहावे. कार्डची अदलाबदल झाल्याचा संशय आल्यास तातडीने बँकेशी संपर्क साधून कार्ड बंद करावे आणि पोलिसांना माहिती द्यावी.

navyugpalghar.com#पालघर #बोईसर #एटीएमफसवणूक #पोलीस #गुन्हेगारी #NavyugPalgharFollow : F।X।YT।INSTA।