वन हक्क कायद्यांतर्गत (FRA) जमीन हक्क असलेल्या शेतकऱ्यांसाठी आता शेतकरी ओळखपत्र

**

          वन हक्क कायद्यांतर्गत (FRA) जमीन हक्क असलेल्या शेतकऱ्यांसाठी आता शेतकरी ओळखपत्र Farmer ID मिळवणे अधिक सोपे झाले आहे. याआधी ७/१२ उताऱ्यात ‘इतर हक्क’ (Other Rights) म्हणून नोंद असलेल्या लाभार्थ्यांना नोंदणी करता येत नव्हती. मात्र, राष्ट्रीय माहिती केंद्र (NIC), आदिवासी संशोधन व प्रशिक्षण संस्था (TRTI) आणि ॲग्रीस्टॅक संचालनालय (AgriStack) यांच्या संयुक्त प्रयत्नातून विशेष कार्यप्रणाली (Workflow) विकसित करण्यात आली असून, आता या सर्व पात्र शेतकऱ्यांची ॲग्रीस्टॅकवर नोंदणी होऊ शकते.

या उपक्रमाचा उद्देश वनजमिनीचे हक्क असलेल्या प्रत्येक व्यक्तीची अधिकृत ओळख निर्माण करून त्यांना शासकीय योजनांचा लाभ सहज मिळवून देणे हा आहे.

नोंदणी कशी कराल?

        शेतकरी खालीलपैकी कोणत्याही माध्यमातून नोंदणी करू शकतात:

वेब संकेतस्थळ (Web Portal) : https://mhfr.agristack.gov.in⁠�

भ्रमणध्वनी अनुप्रयोग (Mobile App) : Google Play Store वरून “Farmer Registry MH” डाउनलोड करा

प्रत्यक्ष सेवा केंद्र (CSC) : जवळच्या केंद्रात किंवा ग्राम महसूल अधिकारी (Talathi) कार्यालयात भेट द्या

नोंदणीची सोपी ३ टप्प्यांची प्रक्रिया

ओळख पडताळणी (e-KYC)

आधार क्रमांकाद्वारे OTP किंवा बायोमेट्रिक वापरून ओळख पडताळणी व मूलभूत माहिती भरणे.

जमिनीची जोडणी (Land Linkage)

स्वतःची श्रेणी निवडणे – उदा. FRA लाभार्थी किंवा वनजमिनीवर प्रत्यक्ष ताबा असलेला व्यक्ती.

डिजिटल स्वाक्षरी (e-Sign)

आधार OTP द्वारे संमती देऊन प्रक्रिया पूर्ण करणे. त्यानंतर SMS द्वारे नोंदणी क्रमांक मिळतो.

पडताळणी कशी होते?

          ‘नाव जुळणी गुण (Name Match Score - NMS)’ प्रणालीद्वारे आधारवरील नाव आणि ७/१२ वरील नाव जुळवले जाते:

८० पेक्षा जास्त गुण: त्वरित मंजुरी

२१ ते ८०: ग्राम महसूल अधिकारी (Talathi) मार्फत पडताळणी

० ते २०: ग्राम महसूल अधिकारी (Talathi) व तहसीलदार (Tehsildar) यांच्याकडून सखोल तपास

मंजुरीनंतर २४–४८ तासांत शेतकरी ओळखपत्र (Farmer ID) तयार होऊन मोबाईलवर SMS येतो.

शेतकरी ओळखपत्राचे फायदे

शासकीय योजनांसाठी थेट व सोपा प्रवेश (PM-Kisan, अनुदान इ.)

लाभ थेट बँक खात्यात (Direct Benefit Transfer - DBT)

बँक कर्ज व किसान क्रेडिट कार्ड (KCC) जलद मिळणे

जमिनीच्या नोंदी डिजिटल व सुरक्षित

हवामान सूचना व पीक सल्ला

पिक विमा दावे जलद

बाजारभाव मोबाईलवर उपलब्ध

आधुनिक शेती तंत्रज्ञानाचे मार्गदर्शन

विशेष सुविधा

‘शेतकरी माहिती अद्यतन विनंती (Update Farmer Request - UFR)’ साधनाद्वारे शेतकरी आपल्या प्रोफाइलमध्ये जमीन जोडणे किंवा काढणे सहज करू शकतात.

       या उपक्रमामुळे FRA अंतर्गत येणारे शेतकरी मुख्य प्रवाहात येणार असून, त्यांना विविध शासकीय लाभ मिळवणे सोपे होणार आहे.

             डॉ. इंदु राणी जाखड, जिल्हाधिकारी, पालघर यांनी

 सर्व पात्र वनहक्कधारक शेतकऱ्यांना आवाहन केले आहे की, त्यांनी लवकरात लवकर ॲग्रीस्टॅकवर नोंदणी करून शेतकरी ओळखपत्र (Farmer ID) तयार करावे.