**१ मे पासून डहाणू मार्गावर १५ डब्यांच्या लोकल फेऱ्या सुरू**
पश्चिम रेल्वेकडून महाराष्ट्र दिनाचे औचित्य साधत १ मे २०२६ पासून डहाणू मार्गावर काही लोकल फेऱ्या १२ डब्यांऐवजी १५ डब्यांच्या करण्यात येणार आहेत. या निर्णयामुळे डहाणू–वैतरणा परिसरातील प्रवाशांना दिलासा मिळणार असून, अनेक वर्षांपासूनची मागणी अखेर पूर्ण होत आहे.
प्रारंभी ४ अप आणि ४ डाउन अशा एकूण ८ फेऱ्यांमध्ये १५ डब्यांच्या लोकल चालविण्यात येणार आहेत. यात सकाळची डहाणू–चर्चगेट फेरी, दुपारच्या गर्दीच्या दोन गाड्या तसेच रात्रीची विरार–डहाणू फेरी यांचा समावेश आहे. वाढत्या प्रवासी संख्येमुळे या मार्गावर अतिरिक्त डब्यांची गरज दीर्घकाळापासून व्यक्त केली जात होती.
डहाणू–वैतरणा प्रवासी सेवाभावी संस्थेसह अनेकांनी सातत्याने या मागणीसाठी पाठपुरावा केला होता. अखेर या निर्णयामुळे संस्थेसह प्रवाशांमध्ये समाधान व्यक्त होत आहे. मात्र भविष्यात डहाणूपासून थेट दादर व चर्चगेटपर्यंत अधिक १५ डब्यांच्या लोकल सुरू कराव्यात तसेच २०–२५ मिनिटांच्या अंतराने नियमित सेवा उपलब्ध करावी, अशी प्रवाशांची मागणी आहे.
दरम्यान, १५ डब्यांच्या लोकल सुरू होत असल्याने प्रवाशांनी आपल्या स्थानकांवरील प्लॅटफॉर्मवर केलेल्या चिन्हांनुसार योग्य ठिकाणी उभे राहावे, असे आवाहन करण्यात आले आहे. यात पहिला दर्जा, महिला व सामान्य डब्यांचे नियोजन लक्षात घेऊन प्रवास करावा, असेही स्पष्ट करण्यात आले आहे.
