🌟 पालघरच्या ग्रामपंचायतींसाठी खास प्रेरणादायी भेट!
मुख्यमंत्री समृद्ध पंचायत राज अभियानांतर्गत
अभिनेते भाऊ कदम यांचा पालघर जिल्हा दौरा
पालघर, दि. ८ जानेवारी २०२६ —
मुख्यमंत्री समृद्ध पंचायत राज अभियानाला नवे बळ देण्यासाठी सुप्रसिद्ध हास्यकलाकार, नाट्य व चित्रपट अभिनेते भाऊ कदम यांचा पालघर जिल्ह्यात विशेष दौरा आयोजित करण्यात आला आहे. १३ जानेवारी रोजी हा दौरा होत असून, ग्रामपंचायतींच्या सक्षमीकरणासाठी थेट ग्रामस्थांशी संवाद साधण्याचा हा उपक्रम महत्त्वपूर्ण ठरणार आहे.
या दौऱ्यात भाऊ कदम
📍 पालघर तालुक्यातील चहाडे व उमरोळी,
📍 डहाणू तालुक्यातील घोलवड,
📍 वाडा तालुक्यातील हमरापूर
या ग्रामपंचायतींना भेट देणार आहेत.
आपली ओळख आणि प्रतिमेचा प्रभावी वापर करून भाऊ कदम मुख्यमंत्री समृद्ध पंचायत राज अभियानातील विविध उपक्रम, ग्रामपंचायतींची भूमिका, लोकसहभागाचे महत्त्व आणि गावपातळीवरील विकास प्रक्रियेचे महत्त्व ग्रामस्थांपर्यंत पोहोचवणार आहेत. त्यांच्या उपस्थितीमुळे हा संदेश अधिक विश्वासार्ह, प्रभावी आणि व्यापक पातळीवर पोहोचेल.
या दौऱ्यामुळे ग्रामपंचायतींमध्ये सुरू असलेल्या नाविन्यपूर्ण विकास उपक्रमांना चालना मिळेल, अभियानाबाबत जनजागृती वाढेल आणि ग्रामस्थांमध्ये “आपले गाव – आपली जबाबदारी” ही भावना अधिक बळकट होईल, असा विश्वास प्रशासनाने व्यक्त केला आहे.
हा उपक्रम मुख्य कार्यकारी अधिकारी मनोज रानडे यांच्या मार्गदर्शनाखाली तसेच उपमुख्य कार्यकारी अधिकारी (पंचायत) अशोक पाटील यांच्या समन्वयातून राबविण्यात येत आहे.
या पार्श्वभूमीवर संबंधित ग्रामपंचायतींचे पदाधिकारी, सदस्य, अधिकारी-कर्मचारी, आशा व अंगणवाडी सेविका, बचत गटाच्या महिला आणि ग्रामस्थांनी मोठ्या संख्येने उपस्थित राहून या जनजागृतीपर उपक्रमात सक्रिय सहभाग घ्यावा, असे आवाहन करण्यात आले आहे.
