महागावातील आदिवासी शेतकऱ्यांच्या जमिनीच्या औद्योगिक संपादनाला विरोध; मोजणी रोखत रास्ता रोकोचा इशारा*

नवयुग पालघर 

***महागावातील आदिवासी शेतकऱ्यांच्या जमिनीच्या औद्योगिक संपादनाला विरोध; मोजणी रोखत रास्ता रोकोचा इशारा***

पालघर | दि. १८ सप्टेंबर २०२६

पालघर तालुक्यातील महागाव परिसरातील आदिवासी शेतकऱ्यांच्या जमिनी औद्योगिक क्षेत्रासाठी संपादित करण्याच्या प्रस्तावाला जमीन मालकांनी तीव्र विरोध केला आहे. संपादनाच्या अनुषंगाने प्रस्तावित मोजणीसाठी अधिकारी घटनास्थळी दाखल झाल्यानंतर जमीन मालक, शेतकरी आणि आदिवासी एकता परिषदेच्या पदाधिकाऱ्यांनी मोजणीला विरोध नोंदवित परत पाठवले.

महाराष्ट्र औद्योगिक विकास अधिनियम, १९६१ मधील कलम ३२(२) अन्वये प्रसिद्ध करण्यात आलेल्या अधिसूचनेत महागाव, तालुका पालघर येथील अनुसूचित क्षेत्रातील जमिनी औद्योगिक क्षेत्रासाठी संपादित करण्याच्या प्रक्रियेचा उल्लेख आहे. या अधिसूचनेच्या पार्श्वभूमीवर जमीन मालकांनी प्रशासनाच्या भूमिकेवर प्रश्न उपस्थित केले आहेत.

जमीन मालकांच्या म्हणण्यानुसार, त्यांनी यापूर्वीच संबंधित प्रशासनाकडे पत्रव्यवहार करून प्रस्तावाला विरोध नोंदविला होता. तसेच प्रांताधिकारी यांची भेट घेऊन आपली भूमिका स्पष्ट केली होती. असे असतानाही मोजणीसाठी अधिकारी घटनास्थळी दाखल झाले. काही जमीन मालकांना मोजणीच्या नियोजित तारखेच्या अवघ्या एक दिवस आधी नोटीस मिळाल्याचा दावा करण्यात आला आहे. त्यामुळे महत्त्वाच्या प्रक्रियेची माहिती इतक्या अल्प कालावधीत देणे कितपत योग्य आहे, असा प्रश्न उपस्थित करण्यात आला.