पालघर जिल्ह्यातील १८ गावांत ‘जल अर्पण’; पाणीपुरवठा योजनांची जबाबदारी ग्रामपंचायतींकडे

नवयुग पालघर

***पालघर जिल्ह्यातील १८ गावांत ‘जल अर्पण’; पाणीपुरवठा योजनांची जबाबदारी ग्रामपंचायतींकडे***

पालघर : जल जीवन मिशनअंतर्गत ‘हर घर जल’ घोषित झालेल्या आणि नळ पाणीपुरवठा योजना पूर्ण होऊन सुरळीत सुरू असलेल्या पालघर जिल्ह्यातील १८ गावांमध्ये २ ऑक्टोबर रोजी ‘जल अर्पण’ कार्यक्रम घेण्यात आला. या उपक्रमांतर्गत नळ पाणीपुरवठा योजनांची माहिती ग्रामस्थांना देऊन त्या योजनांचे हस्तांतरण संबंधित ग्रामपंचायतींकडे करण्यात आले. यापुढे या योजनांची देखभाल, दुरुस्ती, पाण्याची गुणवत्ता तपासणी आणि शाश्वत व्यवस्थापनाची जबाबदारी ग्रामपंचायत व ग्राम पाणीपुरवठा आणि स्वच्छता समितीकडे राहणार आहे.

जल जीवन मिशनअंतर्गत पूर्ण झालेल्या आणि सुरळीतपणे सुरू असलेल्या पाणीपुरवठा योजनांच्या ठिकाणी ‘जल अर्पण’ कार्यक्रम आयोजित करण्याचे आवाहन जिल्हा परिषदेचे मुख्य कार्यकारी अधिकारी मनोज रानडे यांनी केले होते. त्यानुसार जिल्ह्यातील विविध तालुक्यांमध्ये या कार्यक्रमांचे आयोजन करण्यात आले.

हस्तांतरणापूर्वी योजनांची पाहणी

‘जल अर्पण’ कार्यक्रमापूर्वी संबंधित ग्रामपंचायत आणि ग्राम पाणीपुरवठा व स्वच्छता समितीच्या माध्यमातून नळ पाणीपुरवठा योजनांची प्रत्यक्ष पाहणी आणि तपासणी करण्यात आली. पाणीपुरवठा नियमित सुरू आहे की नाही, याची खात्री करण्यासोबतच योजनेची कार्यक्षमता, तांत्रिक त्रुटी आणि आवश्यक कागदपत्रांची तपासणी करण्यात आली. तसेच योजना स्वीकारण्यासाठी ग्रामपंचायत आणि ग्राम पाणीपुरवठा व स्वच्छता समितीची तयारीही तपासण्यात आली.

कार्यक्रमाच्या दिवशी ग्रामस्थांना संबंधित पाणीपुरवठा योजनेची सविस्तर माहिती देण्यात आली. योजनेचे नकाशे, मालमत्ता नोंदवही, पाण्याच्या गुणवत्तेचे तपासणी अहवाल, देखभाल व दुरुस्तीचा आराखडा आणि इतर आवश्यक कागदपत्रे ग्रामपंचायत व ग्राम पाणीपुरवठा आणि स्वच्छता समितीकडे सुपूर्द करण्यात आली.

योजना हस्तांतरित केल्यानंतर तिची नियमित देखभाल व दुरुस्ती कशी करावी, पाण्याच्या गुणवत्तेची तपासणी कशी करावी आणि योजनेच्या व्यवस्थापनात ग्रामस्थांनी कोणती भूमिका बजावावी, याबाबतही मार्गदर्शन करण्यात आले. त्यामुळे पाणीपुरवठा योजनांचे व्यवस्थापन केवळ शासकीय यंत्रणेवर अवलंबून न राहता ग्रामस्तरावर सक्षमपणे करण्यावर भर देण्यात आला.

काही गावांमध्ये रॅलीद्वारे जनजागृती

पाणीपुरवठा योजनांची माहिती देण्याबरोबरच पाणी संवर्धन आणि योजनांच्या देखभालीबाबत जनजागृती करण्यासाठी काही गावांमध्ये ‘जल अर्पण’ दिनानिमित्त रॅली काढण्यात आली. या रॅलीदरम्यान घोषणा देऊन स्वच्छता राखणे, पाण्याचे संवर्धन करणे, पाण्याचा काटकसरीने वापर करणे आणि गावातील पाणीपुरवठा योजनेची जबाबदारी सामूहिकरीत्या पार पाडणे याबाबत ग्रामस्थांना जागरूक करण्यात आले.

कोणत्या तालुक्यातील गावांमध्ये कार्यक्रम?

जिल्ह्यातील सात तालुक्यांमध्ये ‘जल अर्पण’ कार्यक्रमाचे आयोजन करण्यात आले.

वाडा तालुका : कासघर शीरसाट-कासघर, माणिवली-पष्टे आणि शेल्टे-वाघोटे.

पालघर तालुका : साखरे-साखरे.

जव्हार तालुका : डेग्याचिमेट-करधन आणि डेंगाची मेट-तुळजापूर.

मोखाडा तालुका : बेरिस्ते-बेरिस्ते.

डहाणू तालुका : मुरबाडमधील पिंपळशेत, धरमपूर येथील धरमपूर, कोसेसरी व भवाडी, शेणसरीमधील गांगोडी, चारोटी, ओसरविरामधील कंदारवाडी आणि बापुगाव.

तलासरी तालुका : कारंजगाव-माणपाडा.

वसई तालुका : खार्डी डोलीव आणि खनिवडे ग्रामपंचायत क्षेत्र.

या गावांमध्ये पूर्ण झालेल्या आणि सुरळीत सुरू असलेल्या नळ पाणीपुरवठा योजनांची माहिती ग्रामस्थांना देऊन त्यांच्या व्यवस्थापनाची जबाबदारी स्थानिक पातळीवर सोपविण्यात आली.

योजनांचे शाश्वत व्यवस्थापन करण्यावर भर

जल जीवन मिशनचा उद्देश प्रत्येक घरापर्यंत नळाद्वारे नियमित आणि शुद्ध पाणी पोहोचविणे हा आहे. मात्र, पाणीपुरवठा योजना पूर्ण झाल्यानंतरही त्यांची नियमित देखभाल, दुरुस्ती आणि पाण्याच्या गुणवत्तेवर लक्ष ठेवणे आवश्यक असते. या पार्श्वभूमीवर ‘जल अर्पण’ उपक्रमातून योजनांच्या व्यवस्थापनात ग्रामपंचायत, ग्राम पाणीपुरवठा व स्वच्छता समिती आणि ग्रामस्थांचा सहभाग वाढविण्याचा प्रयत्न करण्यात आला आहे.

गावातील पाणीपुरवठा व्यवस्था दीर्घकाळ सुरळीत राहावी, पाण्याची गुणवत्ता टिकून राहावी आणि योजनांच्या देखभालीची जबाबदारी स्थानिक पातळीवर प्रभावीपणे पार पाडली जावी, यासाठी हा उपक्रम महत्त्वपूर्ण ठरत आहे.

#पालघर #पालघरजिल्हा #जलअर्पण #जलजीवनमिशन #हरघरजल #पाणीपुरवठा #जलसंवर्धन #ग्रामपंचायत #ग्रामीणविकास #वाडा #डहाणू #जव्हार #मोखाडा #तलासरी #वसई #नवयुगपालघर #NavyugPalghar

navyugpalghar.com

Follow : F | X | Insta | YouTube