मराठीला अभिजात भाषेचा दर्जा; दैनंदिन वापरातून संवर्धन करण्याचे आवाहन

नवयुग पालघर

***मराठीला अभिजात भाषेचा दर्जा; दैनंदिन वापरातून संवर्धन करण्याचे आवाहन***

**गोदाताई परुळेकर यांच्या स्मृतींना तलासरीत अभिवादन; महाविद्यालयात अभिजात मराठी भाषा दिन साजरा**

तलासरी : मराठी भाषेला अभिजात भाषेचा दर्जा मिळणे ही प्रत्येक मराठी भाषिकासाठी अभिमानाची बाब आहे. मात्र, हा अभिमान केवळ उत्सवापुरता मर्यादित न ठेवता दैनंदिन जीवनात मराठीचा वापर वाढवणे, साहित्याचे वाचन करणे आणि नव्या पिढीत भाषेविषयी प्रेम निर्माण करणे आवश्यक आहे, असे आवाहन तलासरी येथील कॉ. गोदावरी शामराव परुळेकर महाविद्यालयाचे प्राचार्य डॉ. बी. ए. राजपूत यांनी केले.

अभिजात मराठी भाषा दिन आणि क्रांतिवीरांगना कॉ. गोदावरी शामराव परुळेकर यांच्या पुण्यतिथीनिमित्त १० ऑक्टोबर रोजी आदिवासी प्रगती मंडळ संचालित कॉ. गोदावरी शामराव परुळेकर कला, वाणिज्य व विज्ञान महाविद्यालयात मराठी विभाग आणि सांस्कृतिक विभागाच्या संयुक्त विद्यमाने कार्यक्रमाचे आयोजन करण्यात आले होते. यावेळी मराठी भाषेचा गौरव करतानाच गोदाताई परुळेकर यांच्या आदिवासी हक्कांसाठीच्या संघर्षाचे स्मरण करण्यात आले.

प्राचार्य डॉ. राजपूत यांनी मराठी भाषा ही केवळ संवादाचे माध्यम नसून महाराष्ट्राची संस्कृती, ऐतिहासिक परंपरा आणि सामाजिक अस्मितेची ओळख असल्याचे सांगितले. मराठी भाषा, साहित्य आणि संस्कृतीचे जतन व संवर्धन करण्यासाठी विद्यार्थ्यांनी सक्रिय योगदान द्यावे, असे आवाहनही त्यांनी केले.

सहाय्यक प्राध्यापक निशांत ठाकूर यांनी मराठी भाषेचा समृद्ध इतिहास, साहित्यपरंपरा आणि अभिजात भाषेचा दर्जा याविषयी मार्गदर्शन केले. मराठी भाषेचे संवर्धन करण्यासाठी तिचा अधिकाधिक वापर आणि साहित्यवाचनाची आवड जोपासणे गरजेचे असल्याचे त्यांनी अधोरेखित केले.

यावेळी क्रांतिवीरांगना गोदाताई परुळेकर यांच्या सामाजिक कार्यालाही उजाळा देण्यात आला. ‘जेव्हा माणूस जागा होतो’ या त्यांच्या गाजलेल्या पुस्तकातून आदिवासी समाजाचे जीवन, त्यांच्यावर होणारा अन्याय आणि हक्कांसाठीचा संघर्ष प्रभावीपणे मांडण्यात आला आहे. आदिवासी व वंचित समाजाच्या हक्कांसाठी त्यांनी दिलेला लढा आणि सामाजिक न्यायासाठी केलेले कार्य आजही प्रेरणादायी आहे. त्यांच्या कार्याचे स्मरण म्हणजे समता, बंधुता आणि मानवतेची मूल्ये प्रत्यक्ष आचरणात आणणे होय, असा संदेश यावेळी देण्यात आला.

कार्यक्रमाला उपप्राचार्य डॉ. आर. एन. पवार, ग्रंथपाल डॉ. अर्जुन होन, प्राध्यापक, शिक्षकेतर कर्मचारी आणि १५० हून अधिक विद्यार्थी उपस्थित होते. सहाय्यक प्राध्यापिका सुजाता गावित यांनी प्रास्ताविक केले, तर सहाय्यक प्राध्यापक दीपक वाकडे यांनी सूत्रसंचालन केले.

navyugpalghar.com

#अभिजातमराठीभाषादिन #मराठीभाषा #गोदाताईपरुळेकर #तलासरी #पालघर #आदिवासीहक्क #NavyugPalghar

Follow: Facebook | X | YouTube | Instagram