नवयुग पालघर
****सुब्रोतो मुखर्जी आंतरशालेय फुटबॉल स्पर्धा : १५ वर्षांखालील गटात तारापूर विद्यामंदिर,
१७ वर्षांखालील मुलांमध्ये सोनोपंत दांडेकर महाविद्यालय, तर मुलींमध्ये डॉन बॉस्को स्कूल प्रथम****
बोईसर | प्रतिनिधी
भारतातील सर्वात प्रतिष्ठेच्या शालेय फुटबॉल स्पर्धांपैकी एक असलेल्या सुब्रोतो मुखर्जी आंतरशालेय फुटबॉल स्पर्धेच्या पालघर जिल्हास्तरीय फेऱ्या १ व २ ऑगस्ट रोजी बोईसर येथील टीएपीएस (TAPS) परिसरातील ए.ई.सी.एस. मैदानावर उत्साहात पार पडल्या. दोन दिवस चाललेल्या या स्पर्धेत जिल्ह्यातील विविध शाळांतील खेळाडूंनी उत्कृष्ट कौशल्य, संघभावना आणि जिद्दीचे दर्शन घडवत स्पर्धा रंगतदार केली.
क्रीडा व युवक सेवा संचालनालय, महाराष्ट्र राज्य तसेच जिल्हा क्रीडा अधिकारी कार्यालय, पालघर यांच्या संयुक्त विद्यमाने आयोजित या स्पर्धेत १७ वर्षांखालील मुलांच्या गटात १६ संघ, १५ वर्षांखालील मुलांच्या गटात ८ संघ आणि १७ वर्षांखालील मुलींच्या गटात ४ संघांनी सहभाग घेतला.
१५ वर्षांखालील मुलांच्या गटात तारापूर विद्यामंदिर व ज्युनिअर कॉलेज, एमआयडीसी, बोईसर संघाने उत्कृष्ट खेळ करत विजेतेपद पटकावले. ए.ई.सी.एस. स्कूल क्रमांक २ उपविजेता ठरला, तर चिन्मया विद्यालय, बोईसरने तृतीय क्रमांक मिळविला.
१७ वर्षांखालील मुलांच्या गटात सोनोपंत दांडेकर महाविद्यालय, पालघर यांनी विजेतेपद मिळविले. ए.ई.सी.एस. स्कूल क्रमांक ३ ने उपविजेतेपद पटकावले, तर तारापूर विद्यामंदिर व ज्युनिअर कॉलेज संघाने तृतीय क्रमांक मिळवत आपली छाप पाडली.
१७ वर्षांखालील मुलींच्या गटात डॉन बॉस्को स्कूल, बोईसर विजेता ठरला. तारापूर विद्यामंदिर व ज्युनिअर कॉलेज संघाने उपविजेतेपद मिळवत उल्लेखनीय कामगिरी नोंदविली.
विशेष म्हणजे, तारापूर विद्यामंदिर व ज्युनिअर कॉलेजने तीनपैकी तीनही गटांत पदक पटकावत एक विजेतेपद, एक उपविजेतेपद आणि एक तृतीय क्रमांक मिळवून स्पर्धेतील सर्वाधिक सातत्यपूर्ण कामगिरी करणाऱ्या शाळांमध्ये स्थान मिळविले.
जिल्हा क्रीडा अधिकारी सुहास वनमाने यांच्या मार्गदर्शनाखाली स्पर्धेचे नियोजन आणि आयोजन यशस्वीपणे पार पडले. पंच, प्रशिक्षक, क्रीडा शिक्षक, स्वयंसेवक, सहभागी शाळांचे मुख्याध्यापक आणि आयोजक समिती यांच्या सहकार्यामुळे स्पर्धा शिस्तबद्ध व उत्साहपूर्ण वातावरणात पूर्ण झाली.
*सुब्रोतो मुखर्जी स्पर्धेची पार्श्वभूमी*
सुब्रोतो मुखर्जी कप आंतरराष्ट्रीय फुटबॉल स्पर्धा ही भारतातील सर्वात जुनी आणि प्रतिष्ठेची शालेय फुटबॉल स्पर्धा मानली जाते. भारतीय हवाई दलाचे माजी प्रमुख एअर मार्शल सुब्रोतो मुखर्जी यांच्या स्मरणार्थ १९६० साली या स्पर्धेची सुरुवात करण्यात आली. जिल्हा, विभागीय आणि राज्यस्तरीय फेऱ्यांमधून विजेते संघ राष्ट्रीय स्पर्धेसाठी पात्र ठरतात. या स्पर्धेतून अनेक नामांकित फुटबॉलपटूंनी आपल्या कारकिर्दीची सुरुवात केली असून शालेय स्तरावर फुटबॉलला चालना देण्यात या स्पर्धेचे मोठे योगदान आहे.
**Subroto Mukherjee Inter-School Football Tournament concludes on a high; Tarapur Vidyamandir shines with consistent performance**
The Palghar district-level Subroto Mukherjee Inter-School Football Tournament concluded successfully at AECS Ground, TAPS, Boisar. Tarapur Vidyamandir & Junior College won the U-15 Boys title, Sonopant Dandekar College, Palghar emerged champions in the U-17 Boys category, while Don Bosco School, Boisar clinched the U-17 Girls title. Tarapur Vidyamandir stood out by securing a championship, a runner-up finish, and a third place across three categories, showcasing remarkable consistency. The tournament was organised by the Directorate of Sports and Youth Services, Maharashtra, and the District Sports Office, Palghar
🌐 www.navyugpalghar.com
#SubrotoMukherjeeCup #Football #SchoolFootball #Palghar #Boisar #TarapurVidyamandir #DonBosco #SonopantDandekar #Sports #NavyugPalghar
Follow Us:
📘 Facebook | ❌ X | 📸 Instagram | ▶️ YouTube — नवयुग पालघर
