तळागाळातील नवकल्पकांसाठी राष्ट्रीय स्तरावर संधी; पालघरमधून नामांकने पाठविण्याचे आवाहन उत्कृष्ट नवकल्पनांना पाच लाखांपर्यंत पारितोषिक; ३१ ऑक्टोबरपर्यंत प्रवेशिका सादर करण्याचे आवाहन*

नवयुग पालघर

****तळागाळातील नवकल्पकांसाठी राष्ट्रीय स्तरावर संधी; पालघरमधून नामांकने पाठविण्याचे आवाहन

उत्कृष्ट नवकल्पनांना पाच लाखांपर्यंत पारितोषिक; ३१ ऑक्टोबरपर्यंत प्रवेशिका सादर करण्याचे आवाहन****

पालघर, दि. २१ ऑगस्ट : स्थानिक समस्या सोडविण्यासाठी नाविन्यपूर्ण कल्पना विकसित करणारे तळागाळातील नवकल्पक, शेतकरी, कारागीर, विद्यार्थी, उद्योजक आणि पारंपरिक ज्ञान जपणाऱ्या व्यक्तींना राष्ट्रीय स्तरावर आपली प्रतिभा दाखविण्याची संधी उपलब्ध झाली आहे. हनी बी नेटवर्क सर्जनशीलता व सर्वसमावेशक नवकल्पना पुरस्कार – इंडिया २०२५-२६ (Honey Bee Network Creativity & Inclusive Innovation Awards – India 2025-26 – HBNCRIIA-India 2025-26) या पुरस्कारांसाठी नामांकने मागविण्यात आली असून, पालघर जिल्ह्यातील पात्र नवकल्पकांनी या उपक्रमात मोठ्या संख्येने सहभागी व्हावे, असे आवाहन करण्यात आले आहे.

हनी बी नेटवर्क (Honey Bee Network – HBN) आणि तळागाळातील नवकल्पनांना चालना देणारे नेटवर्क (Grassroots Innovations Augmentation Network – GIAN) यांच्या माध्यमातून, गुजरात ऊर्जा पारेषण महामंडळाच्या (Gujarat Energy Transmission Corporation – GETCO) भागीदारीने हा उपक्रम राबविण्यात येत आहे.

तळागाळातील समुदाय, व्यक्ती आणि स्थानिक पातळीवरील नवकल्पकांनी प्रत्यक्ष अनुभवातून विकसित केलेल्या उपयुक्त कल्पना, अभिनव उपाय आणि पारंपरिक ज्ञानपद्धती शोधणे, त्यांना प्रोत्साहन देणे, आवश्यक सहाय्य उपलब्ध करून देणे आणि राष्ट्रीय स्तरावर व्यापक व्यासपीठ मिळवून देणे, हा या उपक्रमाचा प्रमुख उद्देश आहे.

पालघर जिल्ह्यातील शेतकरी, कारागीर, विद्यार्थी, उद्योजक, विविध समुदायांतील नागरिक, पारंपरिक ज्ञानधारक तसेच स्थानिक प्रश्नांवर प्रभावी आणि अभिनव उपाय शोधणाऱ्या व्यक्ती व समूहांना या पुरस्कारासाठी प्रवेशिका सादर करता येणार आहेत. दैनंदिन जीवनातील अडचणी, शेती, पाणी, ऊर्जा, आरोग्य, पर्यावरण, हस्तकला, ग्रामीण विकास किंवा अन्य क्षेत्रांतील स्थानिक गरजांमधून विकसित झालेल्या उपयुक्त नवकल्पनांनाही या माध्यमातून राष्ट्रीय स्तरावर ओळख मिळू शकते.

पुरस्कारांतर्गत उत्कृष्ट तीन नवकल्पनांना अनुक्रमे ५ लाख रुपये, ३ लाख रुपये आणि २ लाख रुपये अशी पारितोषिके देण्यात येणार आहेत. याशिवाय १२ नवकल्पनांना प्रत्येकी ५० हजार रुपयांचे विशेष प्रशस्ती पुरस्कार (Appreciation Awards) देण्यात येणार आहेत.

 निवडक नवकल्पकांना तज्ज्ञांचे मार्गदर्शन आणि नवकल्पनेचा विकास व व्यावसायिक विस्तार करण्यासाठी विकसन सहाय्य (Incubation Support) मिळण्याची संधीदेखील उपलब्ध होणार आहे.

इच्छुक नवकल्पकांनी आपली प्रवेशिका ३१ ऑक्टोबर २०२६ रोजी रात्री ११.५५ वाजेपर्यंत सादर करावी. पुरस्काराची पात्रता, प्रवेशिका सादर करण्याची प्रक्रिया, आवश्यक माहिती आणि इतर मार्गदर्शक सूचना याबाबत अधिक तपशील हनी बी नेटवर्कच्या तळागाळातील नवकल्पना प्रोत्साहन उपक्रमाच्या अधिकृत संकेतस्थळावर उपलब्ध आहेत.

*नवकल्पकांना आवाहन*

पालघर जिल्ह्यातील ग्रामीण, आदिवासी आणि शहरी भागांमध्ये अनेक व्यक्ती स्वतःच्या अनुभवातून स्थानिक समस्यांवर कल्पक आणि उपयुक्त उपाय शोधत असतात. अनेकदा अशा नवकल्पना व्यापक स्तरापर्यंत पोहोचत नाहीत. त्यामुळे आपल्याकडे एखादी उपयुक्त नवकल्पना, आगळीवेगळी कल्पना किंवा पिढ्यान्‌पिढ्या चालत आलेले प्रभावी पारंपरिक ज्ञान असल्यास, ही राष्ट्रीय स्तरावर त्याला ओळख मिळवून देण्याची महत्त्वाची संधी आहे. पात्र नागरिकांनी या संधीचा लाभ घेत प्रवेशिका सादर कराव्यात, असे आवाहन करण्यात आले आहे.

*अधिक माहिती व प्रवेशिकेसाठी :*

GIAN – HBNCRIIA-India 2025-26 पुरस्काराची माहिती

GIAN – पुरस्कार विभाग