नवयुग पालघर
****उमेद मार्टमधील महिला बचत गटांच्या उत्पादनांची विक्रमी विक्री
पहिल्या तीन दिवसांत २२ हजारांहून अधिक रुपयांची उलाढाल; दिवाळी फराळ, भेटवस्तू आणि स्थानिक उत्पादनांसाठी ग्राहकांची पसंती**
पालघर, दि. २८ ऑक्टोबर २०२६ : जिल्हा परिषद पालघर येथे सुरू करण्यात आलेल्या ‘उमेद मार्ट’ची पहिल्या तीन दिवसांत २२ हजार रुपयांहून अधिक विक्रीची नोंद झाली. त्यानंतरही विक्रीचा सकारात्मक कल कायम असून, पुढील दिवसांत एका दिवसात १५ हजार रुपये, तर दुसऱ्या दिवशी १० हजार रुपयांची विक्री झाली.
दिवाळीच्या सणाच्या पार्श्वभूमीवर उमेद मार्टमध्ये महिला बचत गटांनी तयार केलेल्या विविध प्रकारच्या दिवाळी फराळाच्या पदार्थांसह आकर्षक भेटवस्तू, हस्तकला वस्तू आणि स्थानिक उत्पादनांची विक्री सुरू आहे. सणासुदीच्या खरेदीसाठी एकाच ठिकाणी विविध पर्याय उपलब्ध झाल्याने नागरिकांकडून या उपक्रमाला चांगली पसंती मिळत आहे.
महिला बचत गटांच्या उत्पादनांना हक्काची बाजारपेठ
उमेद मार्टमुळे ग्रामीण भागातील महिला बचत गटांच्या उत्पादनांना थेट ग्राहकांपर्यंत पोहोचण्याची संधी मिळाली आहे. महिलांनी मेहनतीने तयार केलेल्या खाद्यपदार्थांना, हस्तकला वस्तूंना आणि स्थानिक उत्पादनांना बाजारपेठ उपलब्ध झाल्याने त्यांच्या उत्पन्नवाढीला चालना मिळत आहे. महिला उद्योजकांना प्रोत्साहन देणारा आणि त्यांच्या आर्थिक सक्षमीकरणाला हातभार लावणारा हा उपक्रम ठरत आहे.
दिवाळी खरेदीसाठी उमेद मार्टला भेट द्या!*
दिवाळीच्या खरेदीसाठी नागरिकांनी उमेद मार्टला भेट देऊन येथील स्वादिष्ट फराळ, आकर्षक भेटवस्तू आणि विविध स्थानिक उत्पादनांची खरेदी करावी. महिला बचत गटांच्या उत्पादनांना पसंती देऊन त्यांच्या आर्थिक सक्षमीकरणासाठी योगदान द्यावे, असे आवाहन जिल्हा परिषदेचे मुख्य कार्यकारी अधिकारी मनोज रानडे आणि अतिरिक्त मुख्य कार्यकारी अधिकारी राजेंद्र पाटील यांनी केले आहे.
महिला बचत गटांच्या कष्टांना प्रोत्साहन देत यंदाची दिवाळी स्थानिक उत्पादनांसह साजरी करण्याची संधी नागरिकांना उमेद मार्टच्या माध्यमातून उपलब्ध झाली आहे.
#उमेदमार्ट #पालघर #महिलासक्षमीकरण #महिलाबचतगट #दिवाळीखरेदी #स्थानिकउत्पादने #स्वयंसहायतागट #नवयुगपालघर
