जव्हारमध्ये ९२ बालकांची हृदय तपासणी; ८ बालकांना शस्त्रक्रियेची गरज

नवयुग पालघर

****जव्हारमध्ये ९२ बालकांची हृदय तपासणी; ८ बालकांना शस्त्रक्रियेची गरज

राष्ट्रीय बाल स्वास्थ्य कार्यक्रमांतर्गत विशेष शिबिर; ज्युपिटर हॉस्पिटल, ठाणे येथे होणार पुढील उपचार****

जव्हार येथे राष्ट्रीय बाल स्वास्थ्य कार्यक्रमांतर्गत आयोजित विशेष हृदयरोग तपासणी शिबिरात ० ते १८ वर्षे वयोगटातील ९२ बालकांची 2D इको तपासणी करण्यात आली. या तपासणीत आठ बालकांना हृदयावरील शस्त्रक्रियेची आवश्यकता असल्याचे निदर्शनास आले असून, त्यांच्या पुढील शस्त्रक्रिया आणि वैद्यकीय उपचारांची व्यवस्था ज्युपिटर हॉस्पिटल, ठाणे येथे करण्यात येणार आहे.

जन्मजात हृदयरोगाचे वेळेत निदान करून योग्य उपचार उपलब्ध करून देण्याच्या उद्देशाने ज्युपिटर हॉस्पिटल, ठाणे आणि पतंगशाह कुटीर रुग्णालय, जव्हार यांच्या संयुक्त विद्यमाने या शिबिराचे आयोजन करण्यात आले. ज्युपिटर हॉस्पिटलमधील तज्ज्ञ डॉक्टरांच्या पथकाने बालकांची हृदयविषयक तपासणी केली. तपासणीनंतर पालकांना बालकांच्या आजाराचे स्वरूप आणि पुढील उपचारांबाबत मार्गदर्शन करण्यात आले.

*आठ बालकांच्या शस्त्रक्रियेसाठी आरोग्य विभागाची कार्यवाही*

तपासणीत शस्त्रक्रियेची आवश्यकता असल्याचे आढळलेल्या आठ बालकांच्या पुढील उपचारांसाठी जिल्हा आरोग्य विभागामार्फत कार्यवाही करण्यात येणार आहे. ज्युपिटर हॉस्पिटल, ठाणे येथे या बालकांच्या शस्त्रक्रिया आणि आवश्यक वैद्यकीय उपचारांची व्यवस्था केली जाणार आहे. त्यामुळे आर्थिक किंवा अन्य अडचणींमुळे उपचारांपासून वंचित राहण्याची शक्यता असलेल्या बालकांना तज्ज्ञ वैद्यकीय सेवा मिळण्यास मदत होणार आहे.

*आरोग्य अधिकाऱ्यांचे मार्गदर्शन*

या शिबिरासाठी जिल्हा शल्यचिकित्सक डॉ. रामदास मराड, जिल्हा आरोग्य अधिकारी डॉ. संतोष चौधरी, RBSK जिल्हा कार्यक्रम पर्यवेक्षक प्रदीप पागी, पतंगशाह कुटीर रुग्णालय, जव्हारचे वैद्यकीय अधीक्षक डॉ. उमेश पाटील आणि तालुका आरोग्य अधिकारी डॉ. रितेश पटेल यांचे मार्गदर्शन लाभले.

RBSK तालुका नोडल अधिकारी डॉ. देवेंद्र पाटील, तालुक्यातील राष्ट्रीय बाल स्वास्थ्य कार्यक्रमाचे वैद्यकीय अधिकारी व कर्मचारी तसेच ज्युपिटर हॉस्पिटल, ठाणे येथील तज्ज्ञ डॉक्टरांच्या पथकाने शिबिराच्या आयोजनासाठी सहकार्य केले.