अतिवृष्टीमुळे पालघर जिल्ह्यातील वीज वितरण यंत्रणेचे ०१ कोटीचे नुकसान; वीजपुरवठा पूर्ववत करण्याचे काम युद्धपातळीवर

नवयुग पालघर

****अतिवृष्टीमुळे पालघर जिल्ह्यातील वीज वितरण यंत्रणेचे ०१ कोटीचे नुकसान; 

वीजपुरवठा पूर्ववत करण्याचे काम युद्धपातळीवर****

पालघर | दि. २४ जुलै : पालघर जिल्ह्यात २२ ते २४ जुलैदरम्यान झालेल्या मुसळधार पाऊस, जोरदार वारे आणि पाणी साचल्यामुळे महावितरणच्या वीज वितरण यंत्रणेचे मोठ्या प्रमाणावर नुकसान झाले आहे. अनेक भागांतील वीजपुरवठा खंडित झाला असून, महावितरणकडून बाधित भागांमध्ये वीजपुरवठा पूर्ववत करण्याचे काम युद्धपातळीवर सुरू आहे.

महावितरणने दिलेल्या माहितीनुसार, या तीन दिवसांत ५२ उच्चदाब (HT) आणि ४५ लघुदाब (LT) विद्युत खांब कोसळले आहेत. तसेच ६.२४ किलोमीटर उच्चदाब आणि २.५० किलोमीटर लघुदाब वीजवाहिन्या तुटल्या आहेत. याशिवाय ६ वितरण बिंदू (DP), २५ वितरण रोहित्र केंद्रे (DTC) आणि १० ऊर्जा फीडर्सचे नुकसान झाले आहे. त्यामुळे जिल्ह्यातील अनेक गावांमध्ये वीजपुरवठा विस्कळीत झाला.

महावितरणने दिलेल्या प्राथमिक अंदाजानुसार, या नुकसानीची एकूण किंमत सुमारे १.०१ कोटी रुपये आहे. यामध्ये विद्युत खांब, वीजवाहिन्या, वितरण बिंदू, रोहित्र केंद्रे आणि ऊर्जा फीडर्सच्या नुकसानीचा समावेश आहे.

सध्या आच्छाड, आमगाव, सावरोली, बोर्डी, आशागड, दापचरी आणि डोलारपाडा या 

३३/११ केव्ही उपकेंद्रांच्या कार्यक्षेत्रातील गावांमध्ये वीजपुरवठा पूर्ववत करण्याचे काम सुरू आहे.

महावितरणच्या म्हणण्यानुसार, हवामान अनुकूल राहिल्यास आणि दुरुस्ती पथकांना बाधित ठिकाणी पोहोचणे शक्य झाल्यास बहुतांश भागांतील वीजपुरवठा आज (२४ जुलै) सायंकाळी ७ वाजेपर्यंत पूर्ववत करण्याचे नियोजन आहे. मात्र, जांबुगाव आणि निंबाळपाडा येथे पाणी साचल्याने व मोठ्या प्रमाणात विद्युत खांब कोसळल्यामुळे या भागातील वीजपुरवठा २५ जुलै रोजी सायंकाळी ७ वाजेपर्यंत पूर्ववत होण्याची अपेक्षा व्यक्त करण्यात आली आहे.

वीजपुरवठा सुरळीत करण्यासाठी महावितरणने विविध ठिकाणी आपत्कालीन देखभाल पथके आणि तांत्रिक कर्मचारी तैनात केले आहेत. सततचा पाऊस, पाण्याखाली गेलेले रस्ते आणि दुर्गम भागांमुळे दुरुस्तीच्या कामात अडचणी येत असल्या तरी काम वेगाने सुरू असल्याचे महावितरणने स्पष्ट केले आहे.

दरम्यान, नागरिकांनी तुटलेल्या वीजवाहिन्या, कोसळलेले विद्युत खांब किंवा इतर विद्युत यंत्रणांपासून दूर राहावे तसेच कोणतीही घटना निदर्शनास आल्यास तातडीने महावितरण कार्यालय किंवा ग्राहक सेवा हेल्पलाईनशी संपर्क साधावा, असे आवाहन करण्यात आले आहे.

🌐 अधिक बातम्यांसाठी भेट द्या : www.navyugpalghar.com⁠

📲 Follow Us : Facebook | Instagram | X | YouTube – Navyug Palghar

#Palghar #HeavyRain #Mahavitaran #PowerRestoration #Electricity #RainUpdate #PalgharNews #NavyugPalghar #Maharashtra #WeatherUpdate

X (Twitter)